• 讀者投稿

2018年的香港,是否仍要賣政府地起私樓?

作者:本土研究社成員陳劍青

(圖片為資料圖片,並不是私樓)


政府同地產新聞都成日都會灌輸一個意識俾公眾,話拎政府地起豪宅,係為咗俾市民有買私樓嘅「選擇」,同埋如果拎咗私樓靚地起公屋嘅話,樓價就會大升,令市民更難置業。

唔好玩啦,依家啲劏房同普通市民水深火熱呀,一個豆膶咁細嘅百呎套房都要成$5,000租呀,你重選乜擇呢?


好多時候,官方都會好刻意將公屋同私樓供應,講成為兩種完全無關既野。但實質既運作係,你拎所有政府地起哂租住公屋,吸走啲劏房戶需求唔駛逼去供養啲私樓炒家,私樓租金咪大跌囉。到炒私樓租金回報冇咁多,私樓少咗人當投資工具,撐唔起個樓價,你鐘意買私樓咪買得起囉,兩者根本係有密切關係。


亦即係話,政府土地起晒啲公屋既有助買樓置業,亦令全民嘅住屋負擔既成本下降。記著,「住屋負擔成本」呢個先係解決房屋問題既真係目標,而唔係盲目追求建屋數量。所以成日話唔拎啲地起私樓樓價就會升,根本係一個啲地產商同政府製造出黎既天大房屋迷思,一直呃你啲地去賣。


試想像,如果將一年原有35,000個單位目標全數起各種廉租公屋,一直持續起夠十年,一年十幾萬人唔駛交租俾啲地主階層,十年就有百幾萬人受惠。此招一出,我包保一招就完勝地產霸權,香港人就唔駛再煩住屋問題,林鄭妳又敢唔敢做?


但妳林鄭依家重喺度講十年之後填好既海先可以開始幫到佢地? 然後就賴環團阻著? 扮搵地? 根本就係度玩野啦。


請攪清楚,房屋問題俾班地產商同炒家投資者攪到今時今日既境地,同過往政府既土地資源分配政策有好大責任,政府重諗著繼續拎政府地去起豪宅,根本只係為左cap水造基建工程、俾地餵肥地產商,而唔係幫市民容易啲置到業。


所以住屋問題一直都係房屋政策既問題,地一直都在,亦一直都在賣,根本同搵地冇關。