• 讀者投稿

一個叫「紅磡」一個近「紅磡」 車費爭一截

作者:火車未到站

紅磡區去北角或者太古,現時由何文田站出發嘅成人八達通收費分別收11.9同14.2,響紅磡站上則分別收13.4同15.4,即係由何文田站出發平過響紅磡站出發。唔准諗,即刻答:咁去鰂魚涌的話,何文田站上車平啲定紅磡站平啲呢?收費表話畀大家知,何文田站出發收14.2,紅磡站出發則收13.4,即係紅磡站出發平過何文田站。



資料來源:火車未到站


呢張圖展示咗由紅磡站同何文田站出發,前往其他車站現時之成人八達通收費,上面紅色代表以紅磡站為起點,下面綠色則代表由何文田站出發,而較深色色塊為兩站出發收費較低者。撇除來往紅磡站與何文田站之車程,由紅磡站出發較平嘅車站有46個,何文田站出發較平嘅有33個,兩個站收費一樣嘅有10個。值得留意係,有19個車站,從何文田站出發同從紅磡站出發嘅收費差距超過$2,意味即使拍咗$2機(港鐵特惠站)前往收費較貴嘅車站,仍然無法由「搭貴D」變做「搭平D」嘅結局。


從呢張圖可以見到,前往東鐵同馬鐵車站,紅磡站上車收費較平;反而同樣以紅磡為總站嘅西鐵,則只有去尖東站係平啲,去到荃灣西及以北車站貴過從何文田站出發。另外,普遍嚟講距離紅磡區越近嘅目的地,紅磡站出發較為便宜;但當前往較遠嘅目的地時,則何文田站較平。

點解會發生咁嘅事呢?源於兩站響唔同時期制訂收費結構。


紅磡站為前九廣鐵路車站,牽涉轉乘前地鐵網絡車程時,會計算由紅磡站前往尖東站或九龍塘站,再由尖沙咀站或九龍塘站前往其他車站之收費,再取各組合收費較低者。即使響兩鐵合併時取消轉乘嘅「再入閘費」,但前往原地鐵車站時收費結構可以見到尖沙咀站或九龍塘站之影子。例如港島區車站收費等級之遞進,與尖沙咀站之車費等級相若;九龍區車站收費等級遞進,則與九龍塘站車費等級類近。


至於何文田站係兩鐵合併後先啟用嘅車站,「與現有票價結構相同」嘅訂價方式就係「抄考」鄰近車站嘅收費方式再微調。何文田站雖然響設計上係觀塘綫同「東西走廊」/屯馬綫之轉車站,但由於車站啟用時只係連接觀塘綫,故制訂票價時視之為觀塘綫車站而非西鐵/馬鐵車站。


今日紅磡站係東鐵及西鐵車站,何文田站係觀塘綫車站,兩者暫不相干,車費有差異尚可理解。問題係,下年東西走廊全線貫通,紅磡與何文田兩站僅以約0.78公里之隧道連成一線,若兩站出發之收費出現如此差異,勢會出現大量唔合理嘅「短貴長平」車費組合。


參考過往做法,預期2018年新車費表將於5月底公佈。而響「票價調整」(咪即係加價囉)之時,鐵路公司或趁機處理部分較唔合理嘅車程收費。未知今年加價嘅時候,又會唔會開始「做手腳」以提早處理新線通車後有可能出現嘅唔合理收費呢?還請大家拭目以待。