• 讀者投稿

建制派冀東九龍綫再設兩延綫 通車勢再延期

作者:火車未到站 Train Not Arriving


東九龍嘅建制派地區組織響3月17日於秀茂坪秀明道公園,以「關注東九龍交通大聯盟」名義舉辦爭取盡快興建東九龍綫嘅集會。呢個「大聯盟」除咗建議跟政府2014年方案興建「東九龍綫」外,仲另外建議兩條分別連接黃大仙半山以及藍田、油塘一帶嘅延綫。站長作為東九龍半山區居民,聽到呢啲「延綫」建議真係好滾動...滾動一秒咁多,細心睇呢兩條「延綫」,除咗得啖笑,都係得啖笑。大聯盟建議嘅「黃大仙延綫」由未來東九龍綫彩雲站出發,經慈雲山、竹園前往九龍塘站;「觀塘延綫」就由(應該唔存在嘅)東九龍綫寶達站出發,經藍田北、油塘東前往油塘站。


黃大仙段簡直無眼睇

「黃大仙延綫」嘅雛形,源自九巴3M線(彩雲-慈雲山北)以及小巴73線(慈雲山中心-竹園-九龍塘又一城)。去過慈雲山嘅朋友大概知道,3M線使用情況唔理想,非繁忙時間班次係接近四個字一班,而搭得3M嘅乘客多數唔係好似M線嘅設立原意咁,搭去就近嘅地鐵站。巴士公司都無心做呢條線,連年縮減服務以調撥資源予其他客量較多嘅巴士線。至於73號小巴方面,站長留意到響慈雲山中心排隊等呢條線嘅乘客唔少,但官方資料顯示該線班次為8-12分鐘一班。純粹以路面交通嘅思維考慮,大聯盟嘅「黃大仙延綫」無錯係順路,但只係求其將一條做到頹嘅巴士路線,同一條服務水平一般嘅小巴路線串埋一齊。係咪真係咁多人會用呢條所謂嘅「黃大仙延綫」?站長表示好大保留。


或者你會話:駁去九龍塘幾方便啊,可以轉到火車又轉到觀塘綫。但問題在於,九龍塘仲有邊度有位可以起多個站呢?就算「建制派」夠膽提議響九龍東軍營「動土」,咁呢條「黃大仙延綫」所帶嚟額外嘅轉車人流又點搞好呢?假設畀建制派成功爭取到呢條「延綫」落成啟用之時,東鐵雖早已可以直接過海至金鐘,但資料顯示大圍至九龍塘呢段東鐵依舊會係樽頸,九龍塘轉車人流依然駱驛不絕。


又或者你會認為,即使係攞兩條客量一般嘅路面公共交通路線作參考去提倡呢條新路線,咁好歹都叫黃大仙山區位置有個站啊。不過呢條「黃大仙延綫」只係能夠直達九龍塘或者彩雲,去遠少少都要轉車,咁其實同依家又有幾大分別?更何況竹園、慈雲山同彩雲居民只要一出龍翔道/彩虹道,就已經有大量巴士路線直達港九新界各區,仲同你搭「黃大仙延綫」出九龍塘行餐死又未必有得坐咁過海、又或者轉線落鑽石山經東西線兜晒半個九龍去新界西北咩?


無錯,慈雲山站當年話起又唔起,確實係對慈雲山居民有所虧欠。呢條東西走向嘅鐵路線,對比起當年南北走向嘅沙中線,無咁受該區斷層地質影響。(順便回帶舊文:https://goo.gl/jyFDTJ )黃大仙山區居民,又係咪真係可以對呢條效益成疑嘅「黃大仙延綫」袋住先呢?


觀塘延綫未必無需求,但做唔做到呢?

大聯盟建議嘅「觀塘延綫」,應該都參考咗開咗接近兩年做到旺場、途經秀茂坪、碧雲道去油塘總站嘅九巴214線。214投入服務以前,觀塘山上確實有強烈訴求要求開設呢類「過山線」,而214載客量亦反映藍田,油塘山上接駁山腳嘅路線有一定需求。講到呢區,新嚟嘅站員阿Ming又有嘢想分享下。


2002年將軍澳線通車,油塘亦係受惠地區之一。由於油塘唔算係一個大區,以現時嘅屋邨屋苑群嚟講,即使係離油塘站最遠嘅高俊苑,去地鐵站最多都只係需要約15分鐘;換轉由鑽石山站行上慈雲山,呢個時間只係去到最南面嘅蒲崗村道學校村。加上油塘所有屋邨屋苑都有有蓋通道連接油塘站,即使起多個油塘東站,對區內居民未必有太大幫助。


至於藍田北站,雖然對遠離藍田站嘅屋邨居民嚟講有一定幫助,但呢個車站嘅定位亦有點曖昧。藍田係一個發展比較成熟嘅社區,加上藍田地勢較高,大部分屋邨屋苑都係依山而建,響設置車站出口規劃嚟講有一定困難。而係另一方面,除咗德田邨、興田邨同康華苑之外,藍田區內大部分屋邨屋苑都有有蓋通道連接藍田站同埋其他區內設施。所以若要改善藍田社區與鐵路車站嘅連接,值得考慮嘅方向係仿效慈雲山,響未有有蓋通道連接藍田站嘅地方加建行人連接系統,比起興建呢段鐵路更有效益。


呢段「觀塘延綫」最唔理想嘅定線,係將東端總站接駁現有嘅油塘站。同上一節「黃大仙延綫」九龍塘站嘅討論類似,首先係設站空間從何來?即使好好彩搵到地方整個新嘅油塘站,咁係咪嫌依家油塘站轉車過海人流唔夠多,要再送多班客一齊迫車?


兩條延綫無論係獨立成線定係支線形式運作,都唔會理想

上述分析純粹將「大聯盟」兩條延綫獨立看待,如果以該「大聯盟」參與組織過往提倡嘅雙Y型支線形式運作,情況又會點呢?唔駛講咁遠,淨係隔離嘅將軍澳線已經有辦你睇,香港嘅鐵路線倘若一個方向有多過一個總站,乘客係搞唔掂的。


康城站於2009年暑假啟用,自此將軍澳線北行就分別有車以寶琳或康城為總站。呢個運作模式行咗接近9年,但時至今日依然聽到有「康城輪迴」呢個講法,唔少將軍澳居民高呼不時「中伏」(經典討論:https://goo.gl/8Ps1ow )。


至於「大聯盟」建議以雙Y型營運「東九龍綫」,意味東西兩端各有兩個總站,走線可以有最少四種組合。無論係安排班次抑或乘客選擇乘坐路線,已經可以預視到係何等混亂:呢班車到唔到鑽石山㗎?由慈雲山去寶琳,要唔要轉車?會唔會有直達車?唔想低估香港人嘅智商,但千祈唔好高估香港人閱讀、聆聽並理解指示嘅能力。


竹園、慈雲山、藍田北、油塘東居民眾多,對公共交通服務需求殷切。鐵路服務倘若能夠覆蓋上述地區,對居民確實係天大喜訊。奈何上述走線建議可行性低、效益成疑,畀著係站長的話,會諗到更好嘅方法可以既服務上述地區,又能夠確保走線有效益同競爭力。咁站長有何高見?此處暫且留白,反正建制派智將眾多,相信佢哋都可以有聰明嘅頭腦諗到更好嘅建議,畀佢哋諗下先啦。當佢哋有新構思時,火車未到站到時先再評論都唔遲呢~


舊文傳送門: 點解 #火車未到站 ?因為山頂嘅朋友大家好,條新路線仲畫緊:https://goo.gl/FuXST2 點解 #火車未到站 ?因為山頂嘅朋友個個落晒山繼續迫餐死,做晒沙甸魚:https://goo.gl/eu4Y6w